Verkefnið hófst árið 2005 en því er ætlað að auðvelda fólki sem hafið hefur vélvirkjanám, unnið við fagið en ekki lokið sveinsprófi, að ljúka náminu. Markmið þess eru því að meta þekkingu sem hefur orðið til á vinnumarkaði inn í skólakerfið, að auka skilning hjá atvinnulífi og skólakerfi á raunfærnimati og þróa aðferðir við slíkt mat.

Unnið hefur verið að þróun verkefnisins Enska og ferðaþjónusta, en þar er markmiðið að bjóða upp á námskeið í ensku á Netinu, fyrir starfsfólk í ferðaþjónustu. Námskeiðið gæti einnig nýst öllum þeim sem koma að samskiptum við enskumælandi ferðamenn. Markmið námskeiðsins er að þjálfa nemendur í að tjá sig munnlega og skriflega um helstu atriði sem varðar þjónustu við ferðamenn.

Unnið er að þróunarverkefninu “Námsráðgjöf á vinnustað” í samvinnu við Fræðslumiðstöð atvinnulífsins, Eflingu-stéttarfélag og Starfsafl. Markmið með verkefninu er að starfsmönnum fyrirtækja verði gefinn kostur á námsráðgjöf á vinnustaðnum sjálfum. Með því er stefnt að auknum tækifærum fyrir félagsmenn Eflingar, Hlífar og V.S.F.K. til að afla sér upplýsinga um mögulegar námsleiðir, einstök námskeið og aðstoð við að setja sér námstengd markmið. 

Mikil gróska er í fullorðinsfræðslu víða um heim. Mímir-símenntun leggur áherslu á að taka þátt í og fylgjast með því sem er að gerast á því sviði bæði innanlands og utan.

Mikil þörf er fyrir úrræði fyrir lesblinda og fólk með lesraskanir í þjóðfélaginu. Lesblindir hafa margir hverjir lent í verulegum erfiðleikum í skólakerfinu og því brýnt að bjóða upp á námskeið sem sérstaklega er ætlað til að taka á og leiðrétta lesblindu.